مستونگ (بلوچستان نیوز) مستونگ میں یونیورسٹی کیمپس اور ڈگری کالج کے طلبا و طالبات نے اپنے جائز مطالبات کے حق میں ڈگری کالج کے سامنے ایک بڑا احتجاجی مظاہرہ کیا اور کوئٹہ کراچی قومی شاہراہ کو ہر قسم کی ٹریفک کے لیے مکمل طور پر بلاک کر دیا۔ شاہراہ کی بندش کے باعث سڑک کے دونوں اطراف گاڑیوں کی میلوں لمبی قطاریں لگ گئیں، جس کی وجہ سے شدید گرمی کے اس موسم میں خواتین، بچوں اور مریضوں سمیت سینکڑوں مسافروں کو انتہائی سخت مشکلات اور شدید پریشانی کا سامنا کرنا پڑ رہا ہے۔مظاہرین کا کہنا تھا کہ صوبائی حکومت اور ہائر ایجوکیشن ڈیپارٹمنٹ کی جانب سے مستونگ کے طلبہ کو مسلسل نظرانداز کیا جا رہا ہے جو کہ سراسر ناانصافی ہے۔ انہوں نے مطالبہ کیا کہ صوبے کے دیگر اضلاع کی طرح مستونگ کے ہونہار طلبا و طالبات کو بھی فوری طور پر میرٹ کی بنیاد پر لیپ ٹاپ فراہم کیے جائیں تاکہ وہ اپنی تعلیمی سرگرمیاں جاری رکھ سکیں۔ احتجاج کی اطلاع ملتے ہی مستونگ کی ضلعی انتظامیہ اور پولیس حکام بھاری نفری کے ہمراہ موقع پر پہنچ گئے، جہاں شاہراہ کو کھولنے اور مسافروں کی مشکلات کو کم کرنے کے لیے مظاہرین کے ساتھ مذاکرات کا سلسلہ جاری ہے۔
مستونگ میں طلبہ نے انٹرنیٹ کی مسلسل بندش کیخلاف قومی شاہراہ پر دھرنا دیدیا
