کوئٹہ، ٹیکس نادہندگان کیخلاف کارروائی، ایک پیٹرول پمپ، چار گودام، 30 دکانیں سیل کردی گئیں

کوئٹہ (ویب ڈیسک) محکمہ ایکسائز اینڈ ٹیکسیشن نے ٹیکس نادہندگان کے خلاف جاری مہم کے دوران سخت کارروائی کرتے ہوئے ایک پیٹرول پمپ، چار گوداموں اور 30 دکانوں کو سیل کردیا۔ محکمہ ایکسائز ٹیکس برانچ نے یہ کارروائیاں سرکی روڈ، اولڈ ٹرک اڈہ اور سیٹلائٹ ٹاﺅن کی مختلف علاقوں میں کیں۔ کارروائی کا مقصد طویل عرصے سے واجب الادا کوٹہ ٹیکس کی وصولی کو یقینی بنانا اور ٹیکس نادہندگان کیخلاف قانون کے مطابق اقدامات کرنا ہے۔ ای ٹی او ایکسائز کا کہنا ہے کہ ٹیکس نادہندگان کو متعدد بار نوٹسز جاری کیے گئے تھے، تاہم عدم ادائیگی پر جائیدادوں کو سیل کرنے کی کارروائی عمل میں لائی گئی۔ محکمہ ایکسائز اینڈ ٹیکسیشن نے واضح کیا ہے کہ ٹیکس وصولی مہم بلاامتیاز جاری رہے گی اور سرکاری واجبات کی ادائیگی تک سیل شدہ املاک نہیں کھولی جائیں گی۔ محکمہ نے شہریوں کو متنبہ کیا ہے کہ وہ بروقت ٹیکس ادا کریں تاکہ قانونی کارروائی سے بچا جاسکے۔