شہداءکی قربانیوں پرفخر، خون رائیگاں نہیں جائے گا، وزیر داخلہ بلوچستان

کوئٹہ(بلوچستان نیوز)وزیرداخلہ بلوچستان میر ضیاءلانگو نے بارکھان کے علاقے میں فتنہ الہندوستان کے دہشت گردوں کے خلاف آپریشن کے دوران سیکیورٹی فورسز کے جوانوں کی شہادت پر گہرے دکھ اور افسوس کا اظہار کیا ہے۔اپنے بیان میں بلوچستان کے وزیر داخلہ میر ضیاءاللہ لانگو نے شہید میجر توصیف احمد بھٹی، نائب فدا حسین، سپاہی ذاکر حسین، سپاہی سہیل احمد اور سپاہی محمد ایاز کو خراجِ عقیدت پیش کرتے ہوئے کہا کہ بہادر سپوتوں نے دشمن کا جرات اور دلیری سے مقابلہ کرتے ہوئے عظیم قربانیاں ہیں۔انہوں نے کہا کہ شہداءکا خون ہرگز رائیگاں نہیں جائے گا اور دہشت گردی کے خلاف جنگ میں سیکیورٹی فورسز کی قربانیاں قوم ہمیشہ یاد رکھے گی۔وزیرداخلہ بلوچستان کا کہنا تھا کہ پوری قوم اپنے بہادر افسران اور جوانوں کی لازوال قربانیوں پر فخر کرتی ہے جبکہ دکھ کی اس گھڑی میں شہداءکے اہل خانہ کے ساتھ مکمل اظہارِ یکجہتی کیا جاتا ہے۔انہوں نے اس عزم کا اعادہ بھی کیا کہ بلوچستان میں امن خراب کرنے والے عناصر کے خلاف کارروائیاں جاری رہیں گی اور دہشت گردی کے ناسور کو جڑ سے اکھاڑنے کے لیے ہر ممکن اقدامات کیے جائیں گے۔